Şirin Cəfəri: Qələmin Gücü, Sözün Məsuliyyəti: 151 İllik Milli Mətbuatımızın Şərəfli Yolu

22 iyul Azərbaycan milli mətbuatının tarixində təkcə bir təqvim günü deyil, xalqımızın maariflənməsinin, milli düşüncəsinin oyanışının və azad söz ənənələrinin təməl daşının qoyulduğu əlamətdar bir tarixdir. Məhz 1875-ci il iyulun 22-də Həsən bəy Zərdabinin böyük əzmkarlığı, vətən sevgisi və ziyalılığı sayəsində nəşr olunan “Əkinçi” qəzeti Azərbaycan xalqının ilk ana dilli mətbu orqanı kimi tarixə düşərək milli mətbuatımızın əsasını qoydu.

“Əkinçi” təkcə qəzet deyildi. O, xalqı elmə, təhsilə, tərəqqiyə və milli özünüdərkə səsləyən bir maarifçilik məktəbi idi. Həsən bəy Zərdabi həmin dövrün bütün çətinliklərinə baxmayaraq xalqın sözünü xalqa çatdırmağı bacardı və Azərbaycan jurnalistikasının gələcək inkişaf yolunu müəyyənləşdirdi. Bu müqəddəs yol sonrakı dövrlərdə yüzlərlə qələm sahibinin əməyi ilə daha da zənginləşdi.

Bu gün Azərbaycan mətbuatı artıq 151 illik zəngin tarixə malikdir. Bu yolun hər mərhələsində həqiqəti yazan, cəmiyyətin problemlərini işıqlandıran, dövlətçiliyimizin möhkəmlənməsinə, milli maraqlarımızın qorunmasına xidmət edən peşəkar jurnalistlərin əməyi danılmazdır. Xüsusilə müasir informasiya dövründə jurnalistin məsuliyyəti daha da artmış, operativliklə yanaşı dəqiqlik, obyektivlik və peşə etikası əsas meyarlara çevrilmişdir.

Milli mətbuatımız Vətən müharibəsi dövründə də öz sözünü dedi. Azərbaycan həqiqətlərinin dünya ictimaiyyətinə çatdırılması, informasiya savaşında ölkəmizin mövqeyinin müdafiəsi, şəhidlərimizin qəhrəmanlığının və ordumuzun şanlı Zəfərinin beynəlxalq auditoriyaya çatdırılmasında media nümayəndələri böyük fədakarlıq nümayiş etdirdilər. Bu, bir daha sübut etdi ki, jurnalistika yalnız peşə deyil, həm də Vətənə xidmət missiyasıdır.

Əziz həmkarlar!

Hər biriniz cəmiyyətin informasiya təminatında, ictimai rəyin formalaşmasında və həqiqətin qorunmasında mühüm missiya daşıyırsınız. Sözün gücünə, qələmin məsuliyyətinə sadiq qalaraq fəaliyyət göstərmək jurnalist peşəsinin ən ali prinsiplərindəndir.

22 İyul – Milli Mətbuat Günü münasibətilə bütün media nümayəndələrini, jurnalistləri, redaktorları, fotojurnalistləri, operatorları, çap mətbəəsində çalışan əməkdaşları və informasiya sahəsində çalışan hər kəsi ürəkdən təbrik edirəm. Sizə möhkəm cansağlığı, tükənməz yaradıcılıq enerjisi, yeni uğurlar, qələminizin daim kəsərli, sözünüzün həmişə həqiqətin tərəfində olmasını arzulayıram.

Milli mətbuatımızın şanlı yolu daim davam etsin, azad sözün və müstəqil mətbuatın işığı heç vaxt sönməsin.

22 İyul – Milli Mətbuat Günümüz mübarək!

Hörmətlə, Şirin Cəfəri