Tərtərin İcra başçısı "Tərtər 1" MMC-nin intensiv meyvə bağlarında xurma yığımına baxış keçirib Fotolar

Azərbaycan Respublikasının Prezidenti cənab İlham Əliyevin cari ilin 25 may tarixində kənd təsərrüfatının inkişafı ilə bağlı keçirdiyi müşavirədə verdiyi tapşırıqların icrasını təmin etmək, aqrar və su təsərrüfatı sahəsində aparılan yeniliklərlə yaxından tanış olmaq, həmçinin “Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026–2030-cu illər üçün Dövlət Proqramı”ndan irəli gələn vəzifələrin rayonda uğurlu icrasını təşkil etmək məqsədilə Tərtər Rayon İcra Hakimiyyətinin başçısı Müstəqim Məmmədov, Tərtər Dövlət Aqrar İnkşaf Mərkəzinin direktoru Mehman Babayevlə birlikdə rayonda fəaliyyət göstərən "Tərtər 1" MMC-nin Seydimli kəndində salınmış xurma bağlarında olub.

Mubarizciler.az xəbər verir ki, Rayon rəhbəri müəssisənin təsisçisi Muxtar Orucovla birlikdə xurma bağlarına baxış keçirib, məhsulun yığılması, saxlanılması və ixrac olunması barədə geniş fikir mübadiləsi aparıb.O dbildirilib ki, bugünə kimi 200 ton məhsul yığılaraq Rusiya bazarlarına ixrac olunub, mövsüm başa çatana qədər isə 2500 ton məhsulun yığılması nəzərdə tutulmuşdur.

Baxış zamanı məlumat verilib ki, müasir standartlara uyğun qurulan "Tərtər 1" MMC-nin ümumi əkin sahəsi 98 hektardır. Bu sahənin 75 hektarını xurma, 12 hektarını nektarin və 11 hektarını şaftalı təşkil edir. Bağların 49 hektarı isə yeni salınmışdır. Ümumilikdə, bağların salınmasına 3,8 milyon manat vəsait sərf edilib. Rayonun məşğulluğuna mühüm töhfə verən müəssisədə hazırda 14 nəfər daimi, 80 nəfər  yerli sakin isə mövüsmi işlə təmin olunmuşdur.

Müəssisədə su ehtiyatlarından səmərəli istifadə edilməsi və su itkisinin qarşısının alınması məqsədilə müasir tələblərə cavab verən mütərəqqi avtomatlaşdırılmış damlama suvarma sistemi qurulub. Eyni zamanda, ərazidə suvarma suyunun fasiləsizliyini təmin etmək üçün 1,5 hektar sahədə tutumu 130 min kubmetr olan xüsusi süni göl yaradılıb ki, bu da bitkilərin vegetasiya dövründə optimal su təminatına tam zəmanət verir.

Rayon İcra Hakimiyyətinin başçısı Müstəqim Məmmədov rayonda kənd təsərrüfatının daha da dinamik inkişaf etdirilməsi, ənənəvi sahələrlə yanaşı belə yüksək məhsuldar intensiv bağçılığın genişləndirilməsi barədə öz tövsiyələrini verib. Rayon rəhbəri qeyd edib ki, müasir aqrar texnologiyaların təsərrüfatlara tətbiqi həm su ehtiyatlarına qənaət edilməsi, həm də daxili və xarici bazarlara rəqabətədavamlı, ekoloji təmiz meyvə məhsullarının çıxarılması baxımından mühüm əhəmiyyət kəsb edir. O, rayonda fəaliyyət göstərən digər sahibkarların da bu cür innovativ təcrübələrdən yararlanmasının vacibliyini önə çəkib.

Eyni zamanda, rayon rəhbəri aqrar sığortanın dövlət tərəfindən dəstəklənməsinin fermerlərin iqlim risklərindən və təbii fəlakətlərdən qorunmasında müstəsna rolunu bir daha vurğulayaraq, bütün fermerləri və torpaq mülkiyyətçilərini öz təsərrüfatlarını vaxtında sığortalamağa çağırıb.

Əlavə olaraq qeyd edək ki, rayon ərazisində 2584,4 hektar meyvə və giləmeyvə bağları var. Onlardan 824,9 hektarı intensiv, 1759,5 hektarı isə ənənəvi bağlardır. Bağların 261,9 hektarı isə yeni salınmışdır. Yeni salınmış bağlardan 49 hektarı intensiv bağçılığa aiddir. Mövcud meyvə bağlarının 845,7 hektarı isə ixracat yönümlü xurma bağlarıdır.

Sonda müəssisənin təsisçisi Muxtar Orucov sahibkarlığın, xüsusilə kənd təsərrüfatının inkişafına göstərilən yüksək diqqət və qayğıya görə ölkə başçısı cənab İlham Əliyevə və Birinci vitse-prezident Mehriban xanım Əliyevaya minnətdarlığını bildirib.