Astara Polisi məktəblilərlə görüşüb FOTO

Astara rayon Şahağac kənd 2 saylı tam orta məktəbdə narkomaniya, erkən nikah və kibercinayətkarlığa qarşı mübarizə mövzusunda maarifləndirici görüş təşkil edilib.

Mubarizciler.az xəbər verir ki, bu barədə Daxili İşlər Nazirliyinin Mətbuat Xidməti məlumat yayıb.

Çıxış edən Astara Rayon Polis Şöbəsinin rəisi polis polkovniki Azər Cəfərov, Rayon İcra Hakimiyyəti başçısının müavini Firəngiz Sadıxova və digər aidiyyəti dövlət qurumlarının nümayəndələri müasir dövrdə bütövlükdə bəşəriyyət üçün böyük bəlaya çevrilən narkomaniya ilə mübarizənin vacibliyindən, sağlam gəncliyin və etibarlı gələcəyin qurulması baxımından belə maarifləndirici görüşlərin davamlı şəkildə təşkilinin zəruriliyindən danışıblar. Narkotik vasitələrin qanunsuz dövriyyəsinin qarşısının alınması istiqamətində hüquq-mühafizə orqanlarının barışmaz və qətiyyətli tədbirləri ilə bağlı görüş iştirakçılarına məlumat verib.

Görüşdə həmçinin kibercinayətkarlıq hallarına qarşı vətəndaşlar tərəfindən riayət edilməli olan ehtiyat və təhlükəsizlik tədbirləri ilə bağlı tədbir iştirakçılarına məlumatlar verilib. Bildirilib ki, heç bir halda bank və digər şəxsi məlumatlar qarşı tərəfə ötürülməməli, kiberdələduzların qurbanı olmamaq üçün tanımadıqları şəxslərdən gələn mesaj və bildirişlər açılmamalıdır.

Sonda müzakirə olunan mövzularla əlaqəli videoçarxlar izlənilib və şagirdlərin sualları cavablandırılıb.