Qusar polisi məktəblilərlə görüşüb - FOTO 0

Daxili İşlər Nazirliyinin Mətbuat Xidmətinin Quba regional qrupundan verilən məlumata görə, Qusar Rayon Polis Şöbəsinin (RPŞ) təşkilatçılığı ilə rayonun Aşağı Ləgər kənd tam orta məktəbində keçirilən tədbirdə polis əməkdaşları, məktəbin pedaqoji heyəti, eləcə də yuxarı sinif şagirdləri iştirak ediblər.

Tədbirdə çıxış edən RPŞ-nin rəisinin xidmət üzrə müavini, polis polkovnik-leytenantı  Emin Kərimov  Daxili İşlər Nazirliyinin Polis Akademiyası barədə şagirdlərə ətraflı məlumat verərək, təhsil müəssisəsinin yaranma tarixi, inkişafı, ölkəmizdə hüquq elminin inkişafına verdiyi töhfələr, daxili işlər orqanlarının ali təhsilli hüquqşünaslarla təmin olunmasındakı fəaliyyətindən danışıb.

Daha sonra  “Narkomaniyaya yox deyək”  mövzusunda çıxış edən RPŞ-nin azyaşlılarla iş üzrə baş inspektoru Ramik Nəzərov narkotik vasitələrin insanlar üçün yaratdığı problemlərdən danışıb və narkomaniyanın cəmiyyətin problemi olduğunu qeyd edib. O, Daxili İşlər Nazirliyinin narkotik vasitələrə qarşı ölkəboyu həyata keçirdiyi genişmiqyaslı əməliyyatlar barədə şagirdləri məlumatlandırıb.

 RPŞ-nin azyaşlılarla iş üzrə inspektoru Ülviyyə Çingizzadə çıxışı zamanı məktəblilərə dövlət və dövlətçilikdən bəhs edərək, onlara sağlam gələcək naminə təhsillərinə daha çox diqqət ayırmalı olduqlarını bildirib.

Çıxış edən RPŞ-nin digər əməkdaşı Fərid Şükürov şagirdlərə kiberdələduzların qurbanına çevrilməmələri üçün onlayn tətbiqlərdən istifadə edərkən ayıq-sayıq  olmalarını diqqətə  çatdırıb.

Yekunda mövzular ətrafında məktəblilərin sualları cavablandırılıb.