Goranboyda iftar süfrəsi açıldı Fotolar

Ruzi-bərəkət, həmrəylik, qardaşlıq, sevgi və mərhəmət ayı hesab olunan Ramazan ayı cəmiyyətimizdə həmrəyliyin və dini-mənəvi birliyin möhkəmləndirilməsinə  xidmət edən mübarək bayramdır.

 Mübarək Ramazan günlərində iftar süfrəsinin təşkil edilməsi cəmiyyətimizin vahidliyinin, ümumi amallar naminə ölkəmizdə dövlət-din arasında sıx birliyin bariz nümunəsidir. 

Mubarizciler.az xəbər verir ki, Goranboy rayonunda rayon İcra Hakimiyyətinin təşkilatçılığı və Milli Məclisin deputatı Bədəl Bədəlovun  dəstəyi ilə iftar süfrəsi təşkil edildi.

İftar süfrəsində din xadimləri, şəhid ailələri, qazilər, rayon ictimaiyyətinin bir qrup  fəalları, rayon İcra Hakimiyyətinin başçısı Məhərrəm Quliyev, Milli Məclisin deputatı  Bədəl Bədəlov  və rayonun digər rəhbər şəxsləri iştirak etdilər. “Qurani-Kərim”dən ayələr oxundu, Ramazan ayının fəzilətləri barədə söhbət açıldı,  xalqımızın əmin-amanlığı üçün dualar edildi. Möhtərəm Prezidentimiz cənab İlham Əliyevin rəhbərliyi  və Birinci vitse-prezident  Mehriban xanım Əliyevanın dəstəyi ilə ölkəmizdə görülən işlərdən, milli-mənəvi dəyərlərə göstərilən diqqət və qayğıdan, dini mərasimlərin keçirilməsinə yaradılan şəraitdən, bütün dünyaya nümunə olacaq tolerantlıq mühitindən, Şəhid ailələrinə, müharibə əlillərinə, veteranlarına göstərilən diqqət və qayğıdan, eləcə də aztəminatlı ailələrin sosial rifah halının yaxşılaşdırılması istiqamətində görülən işlərdən, imzalanan Fərman və Sərəncamlardan söz açıldı.