Samir Qocayev: Güclü dövlət, milli birlik və müstəqil siyasət

Azərbaycanın müasir siyasi tarixində elə mərhələlər var ki, onların əhəmiyyəti yalnız bu günün reallıqları ilə deyil, gələcək nəsillərin dövlətçilik yaddaşında tutacağı yerlə ölçülür. Azərbaycanın ərazi bütövlüyünün və suverenliyinin tam bərpası da məhz belə tarixi dönüş nöqtələrindən biridir. Bu böyük nəticəyə aparan yol uzun illər ərzində formalaşdırılmış ardıcıl dövlət siyasətindən, milli iradədən, siyasi qətiyyətdən və xalq-dövlət birliyindən keçib. Yeni Azərbaycan Partiyasının VIII Qurultayının məhz bu tarixi mərhələdə keçirilməsi onun siyasi çəkisini və ictimai əhəmiyyətini daha da artırır. Qurultay təkcə ölkənin aparıcı siyasi təşkilatının gələcək fəaliyyət istiqamətlərinin müəyyənləşdirildiyi platforma deyil, həm də Azərbaycanın keçdiyi yolun siyasi baxımdan qiymətləndirilməsi, əldə olunan tarixi Zəfərin mahiyyətinin dərk edilməsi və qarşıdakı yeni hədəflərin müəyyənləşdirilməsi baxımından mühüm hadisədir.

Yeni Azərbaycan Partiyasının VIII Qurultayı Azərbaycanın ictimai-siyasi həyatında mühüm hadisə kimi tarixə düşüb. Qurultayın ölkəmizin ərazi bütövlüyünün və suverenliyinin tam bərpa olunmasından sonra keçirilməsi onun siyasi əhəmiyyətini daha da artırır. Bu mərhələ Azərbaycanın müstəqil dövlətçilik tarixində yeni reallıqların formalaşması ilə xarakterizə olunur. Azərbaycan Respublikasının Prezidenti, Yeni Azərbaycan Partiyasının Sədri İlham Əliyevin qurultaydakı çıxışı ölkənin keçdiyi mürəkkəb siyasi yolun, əldə olunan tarixi nailiyyətlərin və qarşıda duran strateji vəzifələrin qiymətləndirilməsi baxımından xüsusi əhəmiyyət daşıyır.

Prezident İlham Əliyevin çıxışında vurğuladığı kimi, Azərbaycanın əldə etdiyi uğurlar təsadüfi deyil. Bu nəticələrin əsasında uzun illər ərzində həyata keçirilən ardıcıl və məqsədyönlü siyasət, milli iradə, siyasi qətiyyət və xalqın vahid mövqeyi dayanır. Azərbaycan xalqının milli maraqlar ətrafında birliyi ölkənin qarşısında duran ən mürəkkəb məsələlərin həllində mühüm amil olub. Eyni zamanda, Azərbaycanın xarici siyasət kursu da milli maraqların qorunmasına və dövlətin beynəlxalq mövqelərinin möhkəmləndirilməsinə yönəlib. Müxtəlif dövlətlərlə qarşılıqlı faydalı əməkdaşlıq əlaqələrinin inkişaf etdirilməsi, regional və beynəlxalq təşkilatlarda fəal iştirak, enerji və nəqliyyat layihələrində Azərbaycanın rolunun artırılması ölkənin geosiyasi çəkisinin güclənməsinə xidmət edib. Bütün bunlar nəticə etibarilə Azərbaycanın qarşısında duran əsas milli məsələnin həlli üçün əlverişli siyasi, iqtisadi və hərbi zəmin formalaşdırıb.

Azərbaycanın son onilliklər ərzində keçdiyi inkişaf yolu göstərir ki, əldə olunan nəticələr təsadüfi və epizodik xarakter daşımır. Əksinə, bu nəticələr uzunmüddətli strateji məqsədlərə əsaslanan dövlət siyasətinin, siyasi sabitliyin, iqtisadi gücün və milli həmrəyliyin məntiqi nəticəsidir. Ölkənin ərazi bütövlüyünün və suverenliyinin tam bərpası da məhz bu ardıcıl siyasətin mühüm nəticələrindən biri kimi qiymətləndirilə bilər. Azərbaycanın ərazi bütövlüyünün və suverenliyinin tam bərpası dövlətçilik tariximizin ən mühüm hadisələrindən biridir. Bu qələbəyə aparan yol uzun və mürəkkəb olub. Ölkənin siyasi, iqtisadi və hərbi potensialının gücləndirilməsi, milli ordunun inkişaf etdirilməsi və beynəlxalq mövqelərin möhkəmləndirilməsi ardıcıl dövlət siyasətinin nəticəsi kimi qiymətləndirilə bilər. Prezident İlham Əliyev çıxışında Azərbaycanın qələbələrinin siyasi əsaslarına diqqət çəkərək qeyd edir ki, xalqın vahid mövqeyi və dövlət rəhbərliyinin qətiyyətli fəaliyyəti ölkəmizə qarşı yönəlmiş bəd niyyətlərin qarşısını almağa imkan verib. Bu baxımdan, Azərbaycanın son illərdə qazandığı nailiyyətlər yalnız hərbi uğur kimi deyil, eyni zamanda milli iradənin, siyasi sabitliyin və dövlətçilik düşüncəsinin təntənəsi kimi dəyərləndirilə bilər.

Milli həmrəylik yalnız hərbi və siyasi məsələlərdə deyil, ölkənin gələcək inkişaf strategiyasının reallaşdırılmasında da əsas amillərdən biridir. Əldə olunmuş Zəfərin qorunması, Qarabağ və Şərqi Zəngəzurun bərpası, yeni iqtisadi imkanların yaradılması və sosial rifahın yüksəldilməsi ümumi məqsədlər ətrafında həmrəyliyin davamlı olmasını tələb edir.Bu baxımdan, milli birlik Azərbaycanın dövlətçilik modelinin yalnız siyasi deyil, həm də sosial dayaqlarından biri kimi çıxış edir.

Yeni Azərbaycan Partiyasının tarixində Ulu Öndər Heydər Əliyevin müstəsna rolu xüsusi qeyd olunmalıdır. Partiyanın yaradılması Azərbaycanın müasir siyasi tarixində mühüm mərhələnin başlanğıcı oldu. Heydər Əliyevin rəhbərliyi ilə formalaşdırılan siyasi kurs sonrakı dövrdə də dövlətçilik siyasətinin əsas istiqamətlərindən biri kimi davam etdirildi. Prezident İlham Əliyevin vurğuladığı “Ulu Öndərin siyasi xətti dəyişməz olaraq qalır” fikri bu baxımdan xüsusi məna daşıyır. Söhbət dövlət müstəqilliyinin möhkəmləndirilməsi, milli maraqların qorunması, siyasi sabitliyin təmin edilməsi və Azərbaycanın beynəlxalq mövqelərinin gücləndirilməsi kimi fundamental prioritetlərdən gedir. Yeni Azərbaycan Partiyasının fəaliyyəti də bu siyasi xəttin mühüm dayaqlarından biri kimi təqdim olunur. Partiyanın ölkənin ictimai-siyasi həyatındakı rolu illər ərzində Azərbaycanın dövlətçilik modelinin formalaşması və inkişafı ilə paralel şəkildə genişlənib. Azərbaycanın iqtisadi, hərbi, diplomatik və texnoloji imkanlarının genişləndirilməsi, yeni regional reallıqların formalaşdırılması və dövlət idarəçiliyinin təkmilləşdirilməsi bu siyasətin yeni mərhələdəki təzahürləri kimi nəzərdən keçirilə bilər.

Müasir dövrdə siyasi partiyaların qarşısında duran əsas məsələlərdən biri dəyişən cəmiyyətin tələblərinə uyğunlaşmaqdır. Yeni texnologiyalar, informasiya mühiti, sosial medianın genişlənməsi, gənclərin siyasi və ictimai proseslərdə artan rolu siyasi təşkilatların fəaliyyətində də yeni yanaşmaların tətbiqini zəruri edir. Bu baxımdan, Yeni Azərbaycan Partiyasının qarşıdakı fəaliyyətində gənclərlə işin gücləndirilməsi, yeni nəslin dövlətçilik ideyaları ətrafında maarifləndirilməsi, ictimai dialoqun genişləndirilməsi və müasir kommunikasiya imkanlarından daha səmərəli istifadə edilməsi xüsusi əhəmiyyət kəsb edir.

Hazırda Azərbaycanın qarşısında duran əsas məsələlərdən biri əldə edilmiş sabitliyin və təhlükəsizliyin qorunmasıdır. Prezidentin çıxışında qeyd etdiyi kimi, bu gün Azərbaycan xalqı təhlükəsizlik, əmin-amanlıq şəraitində yaşayır: “Bu, indiki dünyada böyük sərvət sayıla bilər. Çünki bu gün dünya xəritəsinə baxsaq görərik ki, Azərbaycan xalqı qədər sabitlik, əmin-amanlıq, sülh şəraitində yaşayan çox az xalqlar və ölkələr var. Bu, bizim reallıqlarımızdır. Ona görə təhlükəsizlik tədbirləri daim gündəlikdə olmalıdır. Ölkə daxilində hər hansı risklər mövcud deyil - nə fiziki risklər, nə ideoloji risklər, nə hansısa başqa. Bütün risklər hüdudlarımızın kənarında formalaşır”. Bu reallıq ölkənin gələcək inkişafı üçün mühüm zəmin yaradır. Siyasi sabitlik iqtisadi inkişafın, sosial rifahın, investisiya mühitinin və regional əməkdaşlığın genişləndirilməsi üçün əlverişli şərait formalaşdırır. Azərbaycanın xarici siyasətində əsas məqsədlərdən biri də milli maraqların qorunması və dövlətin daxili işlərinə hər hansı xarici müdaxiləyə yol verilməməsidir. Prezident İlham Əliyevin xarici siyasətlə bağlı mesajları Azərbaycanın müstəqil qərarvermə prinsipinə sadiqliyini bir daha nümayiş etdirir.

Ərazi bütövlüyünün və suverenliyin tam bərpası Azərbaycanın qarşısında yeni imkanlarla yanaşı, yeni məsuliyyətlər də yaradır. Qarşıdakı dövrdə əsas vəzifələrdən biri əldə olunmuş tarixi nəticələrin davamlı siyasi və iqtisadi inkişafa çevrilməsidir. Qarabağ və Şərqi Zəngəzurun bərpası, regionun sosial-iqtisadi potensialının artırılması, dayanıqlı məskunlaşmanın təmin edilməsi və ölkənin bütün bölgələrinin inkişafının sürətləndirilməsi Azərbaycanın yeni inkişaf gündəliyinin mühüm istiqamətlərindəndir. Bu prosesdə cəmiyyətin həmrəyliyi və milli birlik xüsusi əhəmiyyət daşıyır. Çünki Azərbaycanın qarşısında duran strateji məqsədlərin reallaşdırılması yalnız dövlət siyasətinin deyil, həm də ümummilli həmrəyliyin nəticəsi kimi özünü göstərir.

Yeni Azərbaycan Partiyasının VIII Qurultayını bütün bu proseslər fonunda qiymətləndirdikdə onun əsas siyasi əhəmiyyətinin Azərbaycanın yeni inkişaf mərhələsinə keçidi ilə bağlı olduğu görünür. Qurultay bir tərəfdən partiyanın keçdiyi yolun və dövlətçilik prosesində oynadığı rolun qiymətləndirilməsinə, digər tərəfdən isə gələcək fəaliyyət istiqamətlərinin müəyyənləşdirilməsinə imkan yaradıb. Prezident İlham Əliyevin qurultaydakı çıxışı Azərbaycanın keçdiyi mürəkkəb siyasi yolun, əldə olunan tarixi nailiyyətlərin və qarşıda duran strateji vəzifələrin ümumi mənzərəsini təqdim edir. Bu çıxışda dövlət müstəqilliyi, milli birlik, təhlükəsizlik, siyasi sabitlik, Heydər Əliyev siyasi irsinin davamlılığı və Azərbaycanın gələcək inkişaf perspektivləri kimi mühüm məsələlər ön plana çıxır.

Qurultayın əsas mesajlarından biri də ondan ibarətdir ki, əldə edilmiş Zəfər yeni məsuliyyət mərhələsi yaradır. Azərbaycanın bundan sonrakı inkişafı yalnız keçmiş nailiyyətlərin qorunmasından deyil, həmin nailiyyətlərin üzərində daha güclü, müasir və rəqabətqabiliyyətli dövlət quruculuğunun davam etdirilməsindən asılı olacaq. Azərbaycanın ərazi bütövlüyünün və suverenliyinin tam bərpası ölkənin müasir tarixində yeni səhifə açıb. Bu səhifənin əsas məzmununu isə sabitlik, təhlükəsizlik, inkişaf, milli həmrəylik və müstəqil dövlətçilik prinsiplərinin daha da möhkəmləndirilməsi təşkil edir. Bu baxımdan, qarşıdakı dövr Azərbaycanın qazandığı tarixi nəticələri qoruyaraq daha güclü, dayanıqlı və müasir dövlət quruculuğu istiqamətində irəliləməsi baxımından mühüm mərhələ olacaq.

Azərbaycanın müasir tarixində yeni səhifə artıq açılıb. Qarşıdakı əsas məqsəd tarixi nailiyyətləri qorumaqla kifayətlənməmək, onları davamlı inkişaf, güclü iqtisadiyyat, yüksək sosial rifah, müasir dövlət idarəçiliyi və möhkəm dövlətçilik ənənələri ilə tamamlamalıdır. Yeni Azərbaycan Partiyasının VIII Qurultayı yalnız müəyyən bir siyasi mərhələnin yekunu deyil, həm də Azərbaycanın yeni inkişaf mərhələsinin siyasi gündəliyinin formalaşması baxımından mühüm hadisə kimi dəyərləndirilə bilər. Tarixi Zəfərdən sonra qarşıda duran əsas vəzifə həmin Zəfərin siyasi, iqtisadi və sosial dividendlərini gələcək nəsillərin rifahına və Azərbaycanın daha da güclənməsinə yönəltməkdir. Bu isə dövlətçilik düşüncəsinin, milli həmrəyliyin və müstəqil inkişaf strategiyasının bundan sonra da ardıcıl şəkildə davam etdirilməsini tələb edir.

Samir Qocayev

YAP Goranboy rayon təşkilatının sədri