Daşkəsəndə “Narkotikə yox deyək!” mövzusunda maarifləndirici tədbir keçirilib Fotolar

“Bir gənci narkotikdən uzaq saxlamaq – bir ailəni, bir gələcəyi qorumaq deməkdir”

Mubarizciler.az xəbər verir ki, Daşkəsən Rayon Polis Şöbəsinin təşkilatçılığı ilə rayonun 2 saylı tam orta məktəbində “Narkotikə yox deyək!” mövzusunda maarifləndirici tədbir keçirilib. Tədbirdə Daşkəsən Rayon İcra Hakimiyyətinin başçısı Orxan Abbasov, rayon prokuroru, baş ədliyyə müşaviri Şahin İmanov, eləcə də məktəbin müəllim və şagird kollektivi iştirak ediblər. Çıxış edən RPŞ-nin rəisi polis polkovniki Məhəmməd Əhmədbəyli gənclər arasında narkotik vasitələrin fəsadlarından danışaraq bildirib ki, bu bəla ilə mübarizə yalnız hüquqi deyil, həm də mənəvi məsələdir. Polis rəisi vurğulayıb: “Bir gənci narkotikdən uzaq saxlamaq – bir ailəni, bir gələcəyi qorumaq deməkdir.” Daha sonra Daşkəsən Rayon İcra Hakimiyyətinin başçısı Orxan Abbasov və rayon prokuroru, baş ədliyyə müşaviri Şahin İmanov çıxış edərək gəncləri sağlam həyat tərzinə sadiq qalmağa, zərərli vərdişlərdən uzaq durmağa çağırıblar. Tədbirin sonunda məktəblilərə narkotiklərin insan sağlamlığına və cəmiyyətə vurduğu zərərlərlə bağlı maarifləndirici materiallar təqdim olunub.