Goranboy şəhər 2 nömrəli tam orta ümumtəhsil məktəbində “Son zəng” tədbiri keçirildi Fotolar

14 iyun 2025-ci il tarixində Gəncə-Daşkəsən Regional Təhsil İdarəsinin və Goranboy-Naftalan rayonları üzrə Təhsil Sektorunun tabeliyində fəaliyyət göstərən Goranboy şəhər 2 nömrəli tam orta ümumtəhsil məktəbində 2024–2025-ci tədris ilinin yekunu ilə əlaqədar olaraq ənənəvi “Son zəng” tədbiri təntənəli şəkildə təşkil olunmuşdur.

Mubarizciler.az xəbər verir ki, tədbirdə məktəbin rəhbərliyi, Goranboy-Naftalan rayon Təhsil Sektorunun məsul nümayəndələri, Goranboy Rayon İcra Hakimiyyətinin təmsilçiləri, müəllim kollektivi, məzun şagirdlər, onların valideynləri və digər siniflərin şagirdləri iştirak etmişlər.

Tədbir iştirakçıları məktəbdə təşkil olunmuş bayram ovqatlı, tərbiyəvi-ədəbi səhnələrlə zəngin məkanında toplaşmış və bu mənalı günün şahidlərinə çevrilmişlər.

Tədbirin rəsmi hissəsi Azərbaycan Respublikasının Dövlət Himninin səsləndirilməsi ilə açıq elan olunmuş, ardınca torpaqlarımızın bütövlüyü uğrunda canından keçmiş bütün şəhidlərimizin əziz xatirəsi bir dəqiqəlik sükutla yad edilmişdir. Bu anlar tədbirə xüsusi rəsmi və duyğusal atmosfer bəxş etmişdir.

Daha sonra çıxış üçün söz məktəbin direktoru, bacarıqlı təhsil təşkilatçısı Qasımova İlhamə Rafiq qızına verilmişdir. İlhamə Qasımova  öz çıxışında tədbir iştirakçılarını salamlamış, məzun şagirdləri, onların valideynlərini və müəllimləri ürəkdən təbrik etmişdir. O qeyd etmişdir ki, bu gün sadəcə məktəbin son zəngi çalınmır – bu gün həm də bir dövr, bir həyat mərhələsi başa çatır və hər bir məzun üçün yeni, məsuliyyətli, daha ciddi bir həyat yolu başlanır:

“Əziz məzunlar! Sizin bu gün yaşadığınız həyəcanı, sevinci və kövrək duyğuları biz müəllimlər ürəyimizin dərinliyində hiss edirik. Çünki biz sizi yalnız dərslərlə deyil, mənəvi dəyərlərlə, insanlıqla, zəhmətlə yoğurduq. Sizin bu günkü uğurunuz bizim illərlə göstərdiyimiz əməklərin bəhrəsidir. Yolunuz açıq, gələcəyiniz parlaq olsun!”

Direktor çıxışında eyni zamanda valideynlərə də müraciət edərək övladlarının bu mərhələyə qədər yetişməsindəki əvəzsiz roluna görə “Gözünüz aydın olsun!” sözləri ilə təşəkkürünü bildirmiş, müəllim kollektivinin səbrinə, əzminə və fədakarlığına xüsusi minnətdarlıq ifadə etmişdir.

Tədbir zamanı məktəbin pedaqoji kollektivi və qonaqlar tərəfindən də çıxışlar olmuş, məzunlara xoş arzular çatdırılmış, onların gələcək təhsil və həyat yollarında uğurlar dilənmişdir.

Sonra məktəbin şagirdləri tərəfindən hazırlanmış ədəbi-bədii kompozisiyalar, şeirlər, rəqs nömrələri və mahnılar təqdim olunmuş, xüsusilə məzun şagirdlərin öz keçmişlərinə boylanaraq təqdim etdikləri emosional səhnələr tədbir iştirakçılarına duyğulu anlar yaşatmışdır. “Son zəng” simvolik olaraq çalınaraq məzunlara məktəb həyatının rəsmi olaraq başa çatdığını bildirən unudulmaz anlar yaşatmışdır.

 Bu tədbir bir daha göstərdi ki, Goranboy şəhər 2 nömrəli tam orta məktəbi yalnız təhsildə deyil, həm də vətənpərvərlik, milli-mənəvi dəyərlərin təbliği və şagirdlərin şəxsiyyət kimi formalaşmasında önəmli rol oynayan aparıcı təhsil ocaqlarından biridir.

Əziz məzunlar, bu son zəng sizin üçün həm vida, həm də yeni başlanğıcın səsi oldu. Arzularınızın dalınca inamla gedin, çünki siz bizim gələcəyimizsiniz. Yollarınız uğurlu, sabahınız aydın olsun!