Şəhid Sahil İbrahimov dəfn edildi Fotolar

İyunun 3-də 1-ci Qarabağ müharibəsinin daha bir itkin-şəhidi İbrahimov Sahil Nurəddin oğlu dəfn edildi.

Mubarizciler.az ın məlumatına görə, Suraxanı Rayon İcra Hakimiyyəti nin  təşkilatçılığı ilə keçirilən dəfn mərasimində Rayon İcra Hakimiyyətinin başçısı Adil Aliyev , rayonun hüquq-mühafizə orqanlarının rəhbərləri, RİHB-nin müavinləri, Müdafiə və Daxili İşlər nazirliklərinin əməkdaşları, şəhidin ailə üzvləri, doğmaları, şəhid ailələri, müharibə iştirakçıları və rayon ictimaiyyəti iştirak ediblər.

Şəhid üçün cənazə namazı qılındıqdan sonra itkin - şəhidin nəşinin qalıqları yaylım atəşi, hərbi orkestrin müşayiəti ilə Dövlət Himnimizin sədaları və "Şəhidlər ölməz, Vətən bölünməz" şüarı altında torpağa tapşırılıb. Şəhidin ruhuna dualar oxunub, məzarının üzərinə əklillər qoyulub, gül dəstələri düzülüb.

Tabutun büküldüyü Azərbaycanın üçrəngli Dövlət Bayrağı Rayon İcra Hakimiyyətinin başçısı Adil Əliyev tərəfindən şəhidin yaxınlarına təqdim olunub.

Dəfn mərasimində Rayon İcra Hakimiyyətinin başçısı Adil Əliyev çıxış edərək Azərbaycan Ordusunun Ali Baş Komandan, Prezident cənab İlham Əliyevin rəhbərliyi ilə əldə etdiyi şanlı Qələbədən danışıb, Birinci Qarabağ müharibəsi qəhrəmanlarının missiyasının uğurla tamamlandığını bildirib. O, döyüş meydanında qazanılan Zəfər nəticəsində həm ərazi bütövlüyümüzün və suverenliyimizin bərpa olunduğunu, həm də başımıza gətirilən müsibətlərin qisasının alındığını diqqətə çatdırıb.

Qeyd edək ki, 1970-ci il iyulun 23-də Ermənistanın Amasya rayonunun Çivinli kəndində anadan olan Sahil İbrahimov 1993-cü il fevralın 9-da Ağdərə rayonunun Mehmanə kəndi istiqamətində gedən döyüşlərdə itkin düşmüşdü.

Dəfn mərasimindən sonra ehsan süfrəsi açılıb.