Allahşükür Paşazadənin Qafqaz Müsəlmanları İdarəsinin sədri seçilməsində mərhum Heydər Əliyev həlledici rol oynayıb FOTOLAR

Allahşükür Paşazadənin Qafqaz Müsəlmanları İdarəsinin sədri seçilməsində mərhum Heydər Əliyev həlledici rol oynayıb.

Mubarizciler.az ın məlumatına görə, Şeyxülislam özü bu barədə danışıb. 

70-ci illərin sonunda, on birinci Şeyxülislam, axund Mirqəzənfər İbrahimovun vəfatından sonra Zaqafqaziya Müsəlmanları Ruhani İdarəsinə yeni rəhbər seçmək üçün namizədlər müəyyən olunur. 6 namizədin içində gənc Allahşükür Paşazadənin də adı var idi. Qurultaydan əvvəl bu namizədlərin sənədləri baxılmaq üçün Mərkəzi Komitəyə göndərilir.

Şeyxülislamın sözlərinə görə, özü də, digərləri də onun Şeyxülislam seçiləcəyinə inanmırdılar. Lakin QMRİ-nin qurultayında Allahşükür Paşazadə yekdilliklə sədr seçilir. Bu A.Paşazadə üçün də gözlənilməz olur.

Sonralar Şeyxülislam bunun detallarını öyrənə bilib.

QMRİ-nin qurultayı ərəfəsində Şeyxülislamlığa namizədlərin sənədləri Azərbaycan Kommunist Partiyasının Birinci katibi Heydər Əliyevə təqdim olunub:  “Sənədləri onun yanına aparan adam sonralar mənə danışırdı ki, anket məlumatlarından görünürdü ki, namizədlərin hamısı çox yaşlıdır. Heydər Əliyev də sənədlərlə tanış olduqdan sonra mənim anketimi oxuyub və əlini mənim sənədimin üstünə qoyaraq deyib ki, qoy bu cavan oğlan olsun Şeyxülislam.  Çox sonralar Heydər Əliyevin qəbulunda olanda  mənə dedi ki, “Şeyx, mən o vaxt icazə verdim sənin sədr olmağına…”-deyə QMİ sədri açıqlamışdı.

Sovet dövründə QMİ-nin qapalı fəaliyyəti gənc Şeyxin seçilməsi ilə canlanmış oldu.