“Heydər Əliyev məktəblilərin gözü ilə” adlı rəsm müsabiqəsi keçiriləcək 0

“Heydər Əliyev məktəblilərin gözü ilə” adlı rəsm müsabiqəsi keçiriləcək

MUBARİZCİLER.AZ xəbər verir ki, Gəncə-Daşkəsən Regional Təhsil İdarəsinin təşkilatçılığı, Gəncə şəhər Uşaq-Gənclər İnkişaf Mərkəzinin dəstəyi ilə Ümumilli lider Heydər Əliyevin anadan olmasının 100 illiyinə həsr olunmuş “Heydər Əliyev məktəblilərin gözü ilə” adlı rəsm müsabiqəsi keçiriləcək.

Müsabiqə 3 yaş kateqoriyası üzrə (6-9, 10-13, 14-17)  həyata keçiriləcək.

Şagirdlər 17 fevral - 10 mart 2023-cü il tarixləri arasında hər üç yaş qrupu üzrə müsabiqənin mövzusuna uyğun rəsm əsərlərini yekunlaşdırmalıdırlar.

Müsabiqə üzrə tələblər aşağıdakılardır:

-  Müsabiqəyə mövzuya uyğun rəsmlər təqdim olunmalıdır;

- Rəsm müsabiqəsinə hər bir iştirakçı 1 rəsm işi göndərə bilər;

- Müsabiqəyə qatılan məktəb hər yaş qrupu üzrə 1 rəsm işi təqdim etməlidir;

- İki və daha çox iştirakçının birgə hazırladıqları işlər qəbul edilmir;

- Rəsmin işlənmə texnikası sərbəstdir; (quaş, sulu boya, rəngli qələmlər, kollaj, yağlı boya və s.);

- Rəsmlər A3 formatda təqdim edilməlidir;

- Rəsm işləri təqdim edilərkən iştirakçı haqqında ətraflı məlumat – şəhər (rayon), təmsil etdiyi məktəb, sinif, şagirdin adı, soyadı, atasının adı, təvəllüdü və əlaqə vasitəsi qeyd olunmalıdır; 

- Müsabiqəyə təqdim olunan rəsm əsərləri geri qaytarılmır.

Müsabiqənin I, II, III yerin qalibləri hədiyyə, diplom və sertifikatlar ilə təltif olunacaqlar.