Şəmkirdə yeni məktəb binası istifadəyə verilib - Fotolar

Bu gün Prezident cənab İlham Əliyevin qayğısı sayəsində reallaşan çoxsaylı layihələr, həyata keçirilən tədbirlər, təhsilin inkişafı istiqamətində atılan uğurlu addımlar, yeni yaradılan və əsaslı təmir olunan təhsil müəssisələrinin ən müasir tədris avadanlığı ilə təchiz edilməsi bütün bölgələrimizi əhatə edir.

Şəmkir rayonunda da mərhələli şəkildə təhsil müəssisələri yenilənir, şagirdlərin rahat təhsil alması üçün imkanlar genişləndirilir.

Bu dəfə Zəyəm qəsəbəsində yerləşən Azərbaycan Respublikası Elm və Təhsil Nazirliyi tərəfindən əsaslı təmir-bərpa işləri aparılan Əhməd Cəmil adına 1 saylı tam orta məktəb müəllim və şagirdlərin istifadəsinə verilib.

Mubarizciler.az xəbər verir ki, Şəmkir Rayon İcra Hakimiyyətinin başçısı Rəşad Tağıyev və Qazax-Tovuz Regional Təhsil İdarəsinin müdiri Anar Məcidov təhsil müəssisəsində yaradılan şəraitlə tanış olublar. 

İş icraçıları tərəfindən bildirilib ki, məktəbdə şagirdlərin yüksək səviyyədə təhsil almaları üçün hər cür imkanlar yaradılıb.

1176 şagird yerlik 2 korpusdan ibarət məktəb binasında akt və idman zalı, laboratoriya, yeməkxana da müəllim və şagirdlərin istifadəsinə verilib.

Qeyd olunub ki, müasir standartlara uyğun qurulan təhsil müəssisəsində kabinetlər də daxil 59 otaq var ki, bunlar içərisində kimya, fizika, biologiya, hərbi hazırlıq, texnologiya otaqları mövcuddur. 

Məktəbdə həmçinin qrand müsabiqəsi əsasında "Şən uşaqlar " adlı icmaəsaslı məktəbəqədər təhsil qrupu da fəaliyyət göstərir. 

Qeyd edək ki, rayonun digər təhsil müəssisələrinin də mərhələli şəkildə müasir standartlara uyğun yenilənməsi üçün işlər davam etdirilir. Hazırda Şəmkir şəhər Əhməd Cavad adına tam orta məktəbdə və Cahangir Rüstəmov adına tam orta məktəbdə əsaslı təmir-bərpa işlər aparılır.