Rəşad Tağıyev səyyar qəbul keçirdi - Fotolar

Sakinləri narahat edən problemləri yerindəcə öyrənmək məqsədilə Şəmkir Rayon İcra Hakimiyyəti başçısı Rəşad Tağıyevin vətəndaşlarla növbəti səyyar qəbulu rayonumuzun ən böyük kəndi olan Zəyəm Cırdaxan kəndində keçirildi.

Mubarizciler.az xəbər verir ki, Qəbuldan öncə icra başçısı Prezident cənab İlham Əliyevin müvafiq tapşırıqlarına uyğun olaraq Şəmkir rayonunda görülən geniş abadlıq-quruculuq işləri və həyata keçirilən irimiqyaslı sosial infrastruktur layihələri barədə sakinlərə ətraflı məlumat verib.

Daha sonra vətəndaşların müraciətləri, istək və təklifləri dinlənilib, kəndin ümumi problemləri müzakirə olunub. Sakinlərimizin səsləndirdikləri məsələlər məsul şəxslərin iştirakı ilə müvafiq qaydada araşdırılaraq həlli ilə bağlı tədbirlər müəyyənləşdirilib.

Qəbulda bəzi vətəndaşların fərdi müraciətləri yerindəcə həll olunub. Bunlar arasında fərdi yaşayış evinin qarşısında olan qəzalı vəziyyətdəki elektrik dirəyinin dəyişdirilməsi, digər bir vətəndaşın evinin qarşısında qaz sızması nəticəsində yaranan təhlükənin anında aradan qaldırılması, ailə vəziyyəti ilə əlaqədar maddi dəstək göstərilməsi və digər məsələlər olub. 

Həlli vaxt tələb edən məsələlər nəzarətə götürülməklə aidiyyəti təşkilat rəhbərlərinə müvafiq tapşırıqlar verilib.

Sakinlərlə ümumi görüşdən sonra icra başçısı fərdi müraciət etmək istəyənləri qəbul edib.