Elçin Kərimov Samux rayonunda bir neçə təhsil müəssisəsində olub - Fotolar

Gəncə-Daşkəsən Regional Təhsil İdarəsinin müdiri Elçin Kərimov Samux rayonunda bir neçə təhsil müəssisəsində olub.

Mubarizciler.az xəbər verir ki, Elçin Kərimov əvvəlcə tikintisi davam edən M.F.Axundov adına Alıuşağı kənd tam orta məktəbində olub. Bildirilib ki, cari ilin sentyabr ayında tikintisinə başlanan məktəb binasında 360 şagird təhsil alacaq. Qeyd edək ki, məktəbin növbəti tədris ilində müəllim və şagirdlərin istifadəsinə veriləcəyi planlaşdırılır. 

Daha sonra Sərkar kənd körpələr evi – uşaq bağçasında olan idarə müdiri bağça kollektivinə uğurlar arzulayaraq, təhsil müəssisələrinin infrastrukturunun əsaslı şəkildə müasirləşdirilməsindən, yeni istifadəyə verilən bağçalarda uşaqlara yaradılan şəraitdən danışıb.

N.Gəncəvi adına Sərkar kənd tam orta məktəbində mövcud şəraitlə tanış olan idarə müdiri tədris prosesini izləyib, şagird və müəllimlərlə səmimi söhbət aparıb. Məktəbin fəaliyyət göstərdiyi müddət ərzində əldə etdiyi nailiyyətlər, müasir tədris metodları barədə məlumat verən direktor Afaq Möyləyeva qeyd edib ki, hazırda təhsil müəssisəsində 787 şagird təhsil alır.

Sonda H.B.Zərdabi adına Çobanabdallı kənd tam orta məktəbdə  idarə müdiri tədrisin təşkili baxımından qarşıda duran hədəf və istiqamətlər barədə danışıb, müəllimlər ilə söhbət aparıb, onların təkliflərini dinləyib.