Daşkəsəndə təhsilə və xidmətə təşviq edilməsi ilə bağlı tədbir keçirilib - FOTO

Daşkəsən rayon 2 saylı tam orta məktəbində Daşkəsən Rayon Polis Şöbəsinin təşkilatçılığı ilə gənclərin Daxili İşlər Nazirliyi sistemində təhsilə və xidmətə təşviq edilməsi ilə bağlı tədbir keçirilib.

Mubarizciler.az xəbər verir ki, tədbirdə çıxış edən Daşkəsən Rayon Polis Şöbəsinin rəisi, polis polkovniki Seymur Əfəndiyev IX-XI sinif şagirdləri və valideynlərə Polis Akademiyasına qəbul qaydaları, kursantların maddi, sosial təminatları, imtiyazları barədə ətraflı məlumat verib. 

Növbəti tədris ilindən hüquqşünaslıqla yanaşı İnformasiya təhlükəsizliyi ixtisası üzrə də kursant qəbulunun həyata keçiriləcəyi nəzərə alınaraq qəbulun şərtləri barədə şagirdlər məlumatlandırılıblar.

Bundan başqa RPŞ əməkdaşları tərəfindən rayonun Quşçu kənd tam orta məktəbində “Narkomaniyaya yox deyək” mövzusunda maarifləndirmə tədbiri keçirilib.

Görüşdə çıxış edən RPŞ-nin rəisi, polis polkovniki Seymur Əfəndiyev, narkotik vasitələrin cəmiyyətimiz üçün yaratdığı problemlərdən danışıb. O, qeyd edib ki, bu zərərli maddələrin geniş yayılmasının qarşısının alınması istiqamətində hüquq mühafizə orqanları tərəfindən bütün zəruri tədbirlər görülür və bu cinayət əməli ilə məşğul olan şəxslər saxlanılaraq məsuliyyətə cəlb olunurlar.

Erkən nikahların fəsadları mövzusunda da çıxış edən şöbə rəisi, məktəblilərə dəyərli tövsiyələr verib və təhsillərində uğurlar arzulayıb.

Tədbir zamanı daxili işlər orqanlarında xidmət etmək həvəsində olan məktəblilərə Polis Akademiyasına kursant qəbulu qaydaları ilə bağlı ətraflı məlumatlar da verilib, Polis Akademiyasının tarixi və daxili işlər orqanlarında xidmətin şərəfliliyi barədə də çıxışlar edilib.

Tədbirin sonunda məktəbliləri maraqlandıran suallar cavablandırılıb və narkotiklərin insan sağlamlığına vurduğu zərərləri əks etdirən videoçarx nümayiş etdirilib.