Molla rejimi azərbaycanlılara zülm edir - İnsanlığa sığmayan addım

Bunu açıqlamasında Güney Azərbaycandan olan siyasi şərhçi Məhsa Mehdili bildirib. Onun sözlərinə görə, molla rejimi küçələrdə qalan azərbaycanlıları köməksiz qoyub, onları taleyin ümidinə buraxıb:

“Xoy şəhərinin Azərbaycanın milli tarixində əhəmiyyəti böyükdür. Bu şəhər Birinci Dünya Müharibəsində erməni işğalçılarına qarşı Azərbaycanın qalasına çevrilib. Azərbaycan milli hərəkatının ən mühüm mərkəzi olub. Təəssüf ki, Azərbaycanın milli tarixində əhəmiyyətli rol oynamış Xoy şəhəri güneydəki digər Azərbaycan şəhərləri kimi yoxsul saxlanılıb, inkişaf etdirilməyib və İranın iqtisadi təzyiqlərinə məruz qoyulub”.

Məhsa Mehdili vurğulayıb ki, minlərlə azərbaycanlı zəlzələdən zərər görüb. İran hakimiyyəti azərbaycanlılara yardım etmək istəyənlərə mane olur, bu azmış kimi, onları həbslə hədələyir:

“Milli fəallar zəlzələdən zərərçəkmiş soydaşlarımız üçün ianələr toplamağa başlayıblar. Zəlzələ nəticəsində Xoydakı azərbaycanlılar soyuq qış günündə çöldə qalıblar. Çadırlar belə yoxdur. Yemək və su tapılmır. Dövlət qurumları onlarla maraqlanmır. Azərbaycanın milli və ictimai fəalları özləri kampaniya başladıblar. Soydaşlarımız ərzaq və digər ehtiyacların qarşılanması üçün pul yığırlar. Bundan xəbər tutan hakimiyyət nümayəndələri milli fəallara xəbərdarlıq ediblər ki, niyə yardım toplayırsız, sizə kim icazə verib? Azərbaycanlılara yardım edənləri hədələyirlər. Məqsədləri azərbaycanlılara soyuq, şaxtalı havada əziyyət vermək, onları ac-susuz saxlamaqdır. Bu, bizə olan düşmənçilikdən irəli gəlir”.

Qeyd edək ki, bu yaxınlarda Qərbi Azərbaycan ostanının Xoy şəhərində güclü zəlzələ olub. Zəlzələ nəticəsində böyük dağıntılar olub, 3 nəfər həyatını itirib, 1200-dan çox sakin isə yaralanıb. Dağıdıcı zəlzələ səbəbindən evini itirən minlərlə azərbaycanlı acınacaqlı vəziyyətə düşüb.